Já nú blöskrar mér, eins og reyndar fleirum og er engin furða. KB-banki tilkynnti nýlega um 50 milljarða hagnað á s.l. ári!!!! Það var líka í fréttunum um daginn að útflutningsverðmæti sjávarútvegsins hafi á s.l. ári verið 54 milljarðar, aðeins 4 milljörðum hærra en hagnaður eins banka, banka sem á heimsvísu er ekki einu sinni stór, en sjávarútvegur íslendinga er býsna stór. Og stjórnarformaður bankans fékk 130 milljónir í laun á s.l. ári, eða sem svarar ævilaunum verkamanns. Þetta blöskrar mér og mér meira en blöskrar, mér finnst þetta helvítis ógeð, verst að það er ekkert banka-DV sem getur birt eitthvað svæsið um þetta bankadót svo það hengi sig allt eins og perrinn fyrir vestan. Þetta helvítis bankadrasl er svo tryggt í bak og fyrir á kostnað viðskiptavinanna með verðtryggingu, óréttlátustu gjaldtöku sem um getur í heiminum. Ef gengið fellur tapa bankarnir ekki krónu, bara þeir sem hafa fengið lánað hjá þeim. Ef þetta er réttlæti þá er líka réttlátt að bönkum verði gert skylt að hengja sig í perrasnörum eins og þessi fyrir vestan notaði.Það á að hrekja alla barnaníðinga út í horn með snörurnar sínar, líka bankana sem með níðingsskap og okri munu leggja líf margra íslendinga í rúst. Og hana nú. Svo las ég líka um að Eimskip hefði grætt tæpan milljarð og Avion grúp tvo og hálfan og ég velti fyrir mér hvað þessi fyrirtæki eru að basla í þessu sem þau eru að gera, af hverju kaupa þau ekki bara banka??

En auðvitað er alltaf gott ef einhverjum gengur vel og enn betra ef það eru fleiri en færri, helst vildi ég að öll þjóðin græddi, en það virðist ekki vera raunin þó margir telji sig hafa verið að græða í lána-og fasteignasprengjunni á s.l. ári. Fólk tók gjarnan hærri lán en það þurfti og víst er að þegar verðbólgan kemst á skrið, og mark my words það gerist, þá rjúka þessi lán upp úr öllu valdi, það gerir verðtryggingin. Nú þegar er fasteignaverð farið að lækka, sem dregur víst jafnframt úr verðbólgu, en gengi krónunnar á eftir að lækka, það er óhjákvæmilegt, sama hvað hagfræðingar og greiningadeildir segja, nema auðvitað að seðlabankinn hækki stýrivextina um nokkra tugi prósenta á stuttum tíma til þess að stemma stigu við þenslu. Á sama tíma hækka vextir hjá bönkunum sem gerir fólki erfiðara að kaupa fasteignir sem auðvita þýðir lægra fasteignaverð, en jafnframt gerir fyrirtækjum erfiðara um vik í rekstri, en þetta brölt seðlabankans eykur um leið gróða bankanna á vaxtamun.

Jæja, þá er maður loks orðinn maður með mönnum og farinn að blogga á svona værless tölvu. Fékk værless dæmi í jólagjöf og var að troða því í vitsmunaveruna sem ég lem nú í augnablikinu sundur og saman og kannski kominn tími til. Annars er bara allt gott af mér að segja, hef haldið mig við þennan góða og gamla íslenska sið; að troða sig út af ógeðslega góðum mat yfir jólin og liggja svo afvelta uppi í sófa og horfa á grindhorað liðið með álíka flugnasveim umhverfis sig og á meðal öskuhaugum, per person, úti í afríkunum. Ég meina það, það liggur við að maður sé með hroll út af þessu hungurklámi, en maður getur þakkað fyrir að hann kemur helst þegar meltingin er á fullu og sælustunurnar yfirgnæfa sorgarsvipinn á leikurunum.

Ekki meira um það.

Jæja, þá er fylgið að hrynja af Samfylkingunni. Þá er líka að koma fram spádómur sem ég setti fram um það leyti sem formannskosnng fór fram í þeim flokki. Ég spáði því að fylgi flokksins myndi minnka og að hann myndi klofna vegna óánægju þeirra sem studdu Össur og að landsmönnum líkaði illa leikritið sem sett var upp í formannskosningunum, það virðist ætla að ganga eftir; fylgið hrynur og uppi eru raddir um að endurvekja Alþýðuflokkinn. Ég verð bara að segja það að mér finnst þetta svo vitlaust allt saman að ég á varla nokkur orð til að lýsa vanþóknun minni á annarri eins vitleysu og þeirri að vekja upp gamlan draug til þess eins að kljúfa vinstri menn enn frekar en nú er. Ekki nóg með að VG,(á móti-flokkurinn) sé valsandi lausum hala á vinstri kantinum, heldur á að bæta öðrum við og Ingibjargararmurinn hefur víst í hyggju að færa sig yfir á miðjuna, sennilega til að reyna að húkka eitthvert ímyndað framsóknarfylgi. Það er eins og þetta fólk viti ekki af hverju framsókn hefur ekki fengið meira fylgi en raunin er, en það er auðvitað vegna þess að fólk vill ekki vera á miðjunni, það vill vera annaðhvort til hægri eða vinstri.

Nú er allt í fári með þorskinn; hann fær ekki nóg að éta. Þetta er nú gömul frétt og óþarfi að fjölyrða frekar um hana. Kannski meira um vert að vita hvert kolmunninn er farinn og kannski loðnan líka? Jamm. Fór á vínsýninguna í gær og leist vel á það sem boðið var upp á, var hinsvegar ekki í stuði til að detta í það og hrækti því víni í bak og fyrir í dalla og dósir. Smakkaði ein 30 rauðvín, 3 hvítvín og eitt eftirréttavín. Þegar upp var staðið, eða út komið, fannst mér ég hafa verið að taka 30 sopa af sama rauðvíninu. Hvítvínin voru skárri, riesling þó best, en eftirréttavínið, Muscat de Noel, stóð uppúr. Kannski var það vagna þess að ég smakkaði það síðast. Mér finnst eftir á, að víninnflytjendur hafi verið að kynna eitt rauðvínsbragð, eitthvað svona shiraz-merlot, eitthvað íslenskt bragð, eins og þeir þyrðu ekki að bjóða eitthvað sem landinn hefur ekki verið að kaupa í Ríkinu s.l. ár. Eitt rauðvín var þó áberandi lélegt, Mósaík, eða eitthvað svoleiðis, það var engu líkara en fólkið sem var að kynna það vín hefði blandað það með vatni; algert sull.

Það gleður mig alveg einstaklega allt vesenið í kring um Baugsmálið. Það sýnir mér nefnilega, að þó örfáir íslendingar séu langt komnir með að kaupa Danmörku, hálfa London, allt Luxemburg, verðbréfahöllina í Írlandi og óvin íslendinga Nr.1, sjálfan Noreg, að þá er íslenska þjóðin svo fámenn að hún getur ekki fundið einn einasta mann sem ekki ,á einn eða annann hátt, er hægt að bendla við Baug eða afskipti af Baugi. Eina leiðin í því máli virðist vera að skipa næsta ófædda íslending dómsmálaráðherra og þegar hann er fæddur þá skipi hann nýjan (ófæddann) ríkissaksóknara. En þá verða foreldrar hins ófædda dómsmálaráðherra að gæta þess að kaupa ekki bleyjurnar í Bónus, en jafnvel það gæti talist afstaða gegn Baugi, svo að sennilega verður aumingja barnið að vera bleyjulaust, en það gæti líka talist afstaða, því hvar er t.d. keypt meira af rúmfötum en í Rúmfatalagernum og er elveg víst að eigandi hans hafi ekki einhverntíma keypt sér í matinn hjá Baugsveldinu? Því er það svo að þegar ég horfi á fréttir, les blöðin eða hlusta á fréttir í útvarpi verð ég að liggja útaf, mér er nefnilega hætt við því að missa jafnvægisskyn þegar ég veltist um af hlátri vegna frétta af Baugsmálinu. Mér finnst þetta svo fyndið að jafnvel sagan af Finna Hauks í Húnaveri verður lítið fyndin í samanburði.

Var búinn að skrifa svoleiðis æðislegan pistil um RÚV og spillinguna og bláu höndina og Jón Ólafsson og allt, en ekkert af þessu virðist hafa komist inn á helvítis bloggið. Skítt með það, nenni ekki að skrifa það aftur.

Ég hélt í upphafi að það væri sko ekki mikið mál að skrifa eins og eina ævisögu á hverjum degi á bloggið, en komst svo að því að þetta blogg er bara bull og vitleysa og merkilegt hvað maður verður skriflatur þegar grípa á til tölvunnar og láta ljós sitt skína. Það hreinlega gufa upp heilu leksikonin um leið og ég sest við skjáinn og legg þumalputtana á lyklaborðið. Þegar maður síðan kíkir á aðrar bloggsíður og sér allar síðurnar sem sumir ná að skrifa, á hverjum degi NB, þá fer um mig einhversskonar hrollur og ég fer að efast um að mér endist aldur til að skrifa eina einustu ævisögu, hvað þá margar, eins og planið var í upphafi. Svo finnst mér makalaust hve minni sumra er svakalega gott, svo gott raunar að minningarnar renna fram eins og atvikin hafi átt sér stað samdægurs. Tökum t.d. Leó Óla. Ég er næstum því viss um að hann gæti sagt manni hvernig hann var greiddur, og reyndar allir hinir Frumararnir, þegar þeir spiluðu á Hofsósi, eða einhversstaðar. Síðan hans Leós er hreint út sagt sagnfræðileg og á meðan maður les minningar hans rifjast um manns eigin um leið og maður veltir því fyrir sér af hverju maður mundi þetta ekki áður en Leó hafði á orð á því. Svo situr maður sveittur og veltir fyrir sér hvern sjálfan fjandan maður eigi að skrifa, gerir stundum ekki annað en að þurka út hverja vitleysuna á fætur annarri.

Ég hef semsagt komist að þeirri niðurstöðu að ég er enginn bloggari, a.m.k. kemst ég ekki í námunda við þá sem muna hlutina eins og þeir hefðu gerst í gær.Þessvegna hef ég ákveðið að vera ekkert að skrifa ævisögu á bloggið mitt, eða dagbók, eða eitthvað svoleiðis, heldur bara láta vaða á súðum um hitt og þetta, bulla bara og bralla.

Tölvan mín fór gersamlega í kerfi um daginn. Fékk boð frá Þjónustuveri símans um að netfangið mitt hefði verið sett í sóttkví, ég gæti sótt póst en ekki sent hann. Mig var svo sem farið að gruna þetta og kom þessi boð lítið á óvart. Fór ég því að leita eftir einhverjum sem hreinsað gæti vélin, (ég er of vitlaus til að geta það sjálfur). Rakst á einn aðila "Tölvulagerinn" á Leit.is. Hafði samband við gæjann og þetta var bara ekkert mál; bara að koma með tölvuna þegar ég vildi. Daginn eftir brá ég mér í Engihjallann með vélina og gæinn, Níels, sagðist nú ekki vera lengi að þessu, hann myndi hafa samband fljótlega, sem hann og gerði, eða daginn eftir. Sagðist vera búinn og þetta kostaði 8 þúsund kall. Ég sótti vélina og fór heim. Þegar til átti að taka virkaði ekkert í vélinni; komst ekki á netið, var þó í stöðugu sambandi við Þjónustuverið. Þeim sýndist vélin ekki finna netkortið, eða eitthvað. Hringdi í gæjann og hann bað mig að koma með dótið. Brunaði í Kópavoginn og það var tæpur klukkutími hjá gæjanum, þurfti ekki að borga fyrir það. Ég heim og enn virkaði helv... draslið ekki, þó var ég í sambandi við Þjónustuverið og þar á bæ voru menn alveg standandi hlessa yfir þessu og sögðu mér að ég yrði að fara með vélina´til viðurkends tölvuviðgerðarmanns, bentu mér á Tölvulistann eða Task. Valdi Listann og hér sit ég við draslið og pikka þetta inn, búinn að setja allar vírusvarnir sem Síminn bendir manni á. Sennilega á ég eftir að sjá eftir þessum 8 þúsund kalli hjá þessum aula í Kópavoginum alla mína ævi og hika ekki við að benda hverjum sem heyra vill, á hverslags svikari þessi aumi maður er.

Fór á helvíti góða tónleika á Gauk á Stöng á föstudagskvöldið. Það voru 4 hljómsveitir að spila þarna, frekar fátt fólk, en stemmingin góð. Fyrst steig á sviði band héðan úr Reykjavík, held nafnið hafi verið ÆLA. Svolítið skrítið rokk hjá þeim, en í lagi. Næst var á sviðið hljómsveitin sem ég kom aðallega til að heyra og sjá: MÚSKAT frá Akureyri. Þar lemur Skúli trommurnar, Kári heitir gítarleikarinn og bassaleikarinn heitir Anna. Virkilega þétt og frambærileg hljómsveit og miklu betri en þegar ég heyrði í þeim um verslunarmannahelgina 2003 á Akureyri. Líka betri græjur á Gauknum. Þau spila virkilega gott rokk, svona mitt á milli hevví og pönks, þó með aðeins minni áherslu á pönkið. Mest þótti mér þó um hve Skúli er batnandi og faglegur á trommunum, varla feilslag á þeim bænum. Næst lék Jan Mayen og þeir voru þéttir, talsverð æfing hjá þeim og reynsla. Þegar hér var komið sögu langaði okkur eitthvað út í bæ og yfirgáfum staðoinn áður en Lokbrá spilaði og veit ég því ekkert um þá.

Sama kvöldið var Plant að trylla öldunga í Laugardalshöll og skilst mér að hækjur, göngugrindur og fleira þ.h. hafi legið eins og hráviður u, hallargólfið þegar gaurinn tók Immigrant song og Whole lotta love. Sjálfsagt hefði maður gengið fram af sér ef maður hefði verið þarna, en ég ákvað, þegar ég fyrst heyrði af komu kallsins til landsins, að muna hann bara eins og hann var með LZ. Sleppti því þessu fári og hlustaði í staðinn á unga og upprennandi rokkara og var ekki svikinn af því. Toppurinn á kvöldinu var svo nýbökuð vaffla með sultu og rjóma á Lækjartorgi.

Nú eru sérfræðingar búnir að reikna það út að landsbyggðin leggur miklu meira, í sköttum, til þjóðarbúsins en hún fær til baka. Sem dæmi um þetta segir Fréttablaðið að t.d. Norðausturlandskjördæmi leggi til um 10% skatta landsmanna en fái ekki nema 7%  til baka. Þessi 3% sem verða eftir í Reykjavík eru svo væntanlega notuð til þess að byggja sundabrautir og allskonar annað dót á höfuðborgarsvæðinu.

Nú er lag. Nú eru þeir í vandræðum með EB. Frakkar fella líklega nýja stjórnarskrá EB í þjóðaratkvæðagreiðslu í næsta mánuði og þá segja fróðir menn að ein leið EB til þess að þessi nýja stjórnarskrá gangi í gildi sé að bjóða íslendingum aðild. Þarna getum við íslendingar átt sterkan leik á borði, fengið allskyns kröfur samþykktar, s.s. full yfirráð yfir fiskimiðunum o.fl. Ég álít að við megum ekki láta þetta tækifæri ganga okkur úr greipum. Mergt vinnst með aðild, helsti kosturinn að mínu mati er gjaldmiðilinn. Það er löngu kominn tími til að leggja niður krónuna, þennan litla og fárveika gjaldmiðil. Hátt gengi hennar undanfarið er sem fallöxi yfir þjóðinni. Manni hrýs hugur að við afleiðingum þess að krónan falli, þá er ég að tala um 10-15% fall, og þar sem öll lán landsmanna eru verðtryggð hækka skuldir og afborganir og allt fer í vaskinn á heimilunum. Svo ekki sé talað um alla spákaupmennskuna sem nú ríður röftum peningamarkaðsins. Það græðir engin á þessu háa gengi nema spákaupmenn og braskarar; eða hefur einhver orðið var við að vörur hafi lækkað vegna gengisins?Hátt gengi er auðvitað mjög gott fyrir bankana og "útrásina". Gott að geta keypt evrur og dollara á spottprís hér heima og verslað svo fyrir þetta í útlöndum

Annars er, og hefur verið, mín skoðun að við eigum að ganga í EB, hvort sem við fáum einhverju um fiskimiðin að ráða eða ekki. Menn grenja og segja að auðlindin færist þá í hendur útlendinga, en ég spyr á móti: Hvað með það? Eru útlendingar eitthvað verri kvótaeigendur en íslendingar? Ekki á ég neinn kvóta sem ég þarf að verja fyrir útlendingum og þessir fáu sem eiga kvótann hafa nú ekki beinlínis sýnt að þeir láti sig varða þó fólk lepji dauðann úr skel eftir að þeir hafa farið með kvótan frá óteljandi byggðarlögum, eða selt hann.

Nú á að fara að selja símann, eins og bankana forðum. Ég er alfarið á móti sölunni, eins og ég var á móti sölu bankana. Síminn hefur undanfarin ár skilað um 2 milljörðum inn í ríkissjóð á ári og maður selur bara ekki bestu mjólkurkúna í fjósinu, bara til að selja, en það er einmitt það sem verið er að gera, þ.e. selja. Frjálhyggjuöflin gera kröfur um að ríkið sé ekki að þvælast fyrir á samkeppnismarkaði og standi ekki í atvinnurekstri í þeim greinum sem öflunum þóknast hverju sinni. Frjáls samkeppni skal vera á öllu og í öllu, sem er svo sem ágætt að vissu marki. En rafmagn, sími heilbrigðismál, samgöngur og þ.h. á að vera á hendi ríkisins. Þetta allt vilja þessi áhrifaríku frjálshyggjuöfl að verð selt, eða gefið. Afkáraleg tilraun ríkisins til að búa tenginet rafmagns undir sölu hefur valdið hækkun á rafmagni, sumsstaðar yfir 100% og einkavæðing á sölu rafmagns er ekki beint upplífgandi, ef litið er til USA, hvar allt er svo frjálst. Þar eru rafmagnsvirki að grotna niður vegna lélegs viðhalds og ekki nema nokkur ár síðan stór hluti USA og Kanada varð rafmagnslaus og fólk varð skelfingu lostið og hélt að um enn eina hryðjuverkaárásina væri að ræða en svo kom í ljós að þetta var vegna slælegs viðhalds í spennistöð í USA, það er nefnilega ekki arðbært að stunda viðhald. Almannatryggingakerfið er að verða einn allsherjar brandari og yfirvöld farast ekki fyrir í einkavæðingu sinni á því. Þar er sparað svo mikið að gamalmenni liggja mölbrotin og hálfdauð á stofnunum í áraraðir, en þannig er þetta víst líka í guðs eigin landi, USA, og ekkert við því að gera, frjálhyggjan lifi !

En síman skal selja, hvað sem öðru líður, og upp er risin hópur fólks sem er að safna saman hlutabréfaloforðum til þess að almenningur geti keypt fyrirtækið. Manni liggur við gráti þegar maður upplifir svona vitleysu; að reyna að fá þjóðina í lið með sér til að kaupa það sem þjóðin þegar á ! Nær hefði verið að efna til mótmæla og benda ríkisstjórninni á að ef nauðsynlegt væri aðlosna við símann úr eigu þjóðarinnar, væri langskynsamlegast að senda hverjum og einum þegni hlutabréf í símanum og hann gæti svo ráðstafað því eins og honum sýndist, selt eða gefið.

Síðustu daga hafa margir hér á Reykjavíkursvæðinu tjáð sig um væntanleg Héðinsfjarðargöng og flestir verið á móti þeim, fundið þeim allt til foráttu. Auðvitað! Við hverju bjuggust menn? Helsta röksemd reykvíkinga er að meiri þörf sé fyrir Sundabraut í Reykjavík en göngin. Það sé svo mikill umferðarþungi á stundum í Reykjavík að menn séu allt að 45 mínútum að komast frá Seltjatnarnesi upp í Mosó. Ég meina, só what? Af hverju ekki að fara bara fyrr af stað? Ég bý í Grafarholti og ætli ég að vera mættur á einhvern ákveðinn stað á ákveðnum tíma þá legg ég ekki af stað 5 mínútum áður en ég ætla að vera þar og kenni svo umferðinni eða sundabrautarleysinu um. Vitanlega er mikil umferð í Reykjavík, það er vegna þess að svo margir eru á ferðinni, en ekki vegna þess að það vantar Sundabrautina. Og það eru ekki allt reykvíkingar á ferðinni um götur Reykjavíkur. Fjöldinn allur af fólki kemur úr nágranna sveitarfélögunum til vinnu í Reykjavík. Ættum við sem styðjum Héðinsfjarðargöng að spyrja eins og andstæðingarnir; af hverju vinnur þetta fólk ekki bara í sínu sveitarfélagi? Hvað þarf það að vera að flakka svona um? Kannski yrði enginn þörf fyrir Sundabraut ef svo væri? En þrónin er nú bara þannig að fólk vill komast um og sækja vinnu þar sem hana er að hafa og búa þar sem það vill. Þannig er það líka með siglfirðinga. Það er lítil atvinna á staðnum og þeir eygja leið til meiri og fjölbreyttari atvinnu með þessum göngum, lái þeim það hver sem vill, en líti jafnframt í eigin barm.

Enn á ný er orrahríðin um "göngin" hafin og menn spyrja sig hvort holan verði arðbær og miða gjarnan við vegaframkvæmdir á suðurlandi. Frá mínum bæjardyrum séð er bygging ganga ekkert vafamál, miðað við ástand Strákaganga og vegarins frá þeim og inn í Fljót, þ.e.a.s. jarðsigið og allt það. Þannig er nefnilega mál með vexti að það veit enginn hvað verður um þann veg, hann getur horfið hvenær sem er, hefur sýnt tilburði til þess og finnst mér yfirvöld vegamála vera furðu sofandi yfir því.Vandamálið er að undirstaða vegarins er hálfpartinn fljótandi ofan á bergi og þessi jarðvegur er á leið niður snarbratta sjávarbakkana þarna á Almenningunum og ekkert er hægt að gera við því. Kannski svartsýni að segja að ekkert sé hægt að gera, flestu má bjarga í svona málum ef peningar eru til. Ég minnist þess að hafa fyrir áratugum heyrt þingmann Alþýðubandalagsins tala um hvernig best væri að bæta þennan veg og niðurstaðan var, að mér skilst eftir samræður þingmannsins við sérfræðinga, að eina leiðin til þess að gera þennan veg traustan og vel akandi væri að byggja vegsvalir utan í fjallshlíðina. Gallinn á þeirri gjöf Njarðar var svo auðvitað sá að þetta kostaði svo mikla peninga að það væri ekki á færi þjóðarinnar að ráðast í slíkar framkvæmdir. Þeir sem hafa farið um þessar slóðir skilja og sjá auðvitað að niðurstaðan er rétt. Nógu dýrt er að byggja veg á jafnsléttu eða bora göng í gegn um fjöll hvað þá að byggja slík mannvirki á súlum utan í fjallshlíð einhverja tugi metra uppi í lofti.

En aftur að göngunum. Þegar við nokkrir félagar á Siglufirði buðum fram Þ-listan forðum daga, var að hefjast umræða um Héðinsfjarðargöng. Við lýstum því þá yfir í stefnuyfirlýsingu listans að við værum á móti því að fjall væri næg ástæða til þess að bora í gegn um það gat. Við töldum nær að nota þá peninga, sem fylgjendur ganganna töldu þurfa í framkvæmdina, í uppbyggingu atvinnumála í bænum í þeim tilgangi að fjölga íbúum, við stóðum nefnilega í þeirri meiningu að fyrst þyrfti hænu áður en menn gætu farið að vonast eftir eggi, aðrir vilja svo meina að til þess að fá hænu þurfi egg, en það er önnur saga og miklu flóknari.Með ástand vegarins yfir Almenninga í huga er ég þó í dag sannfærður um að siglfirðingar þurfa ný jarðgöng, spurningin í mínum huga er þó hvar slík göng eiga að vera og hvert þau eiga að liggja. Trausti á Bjarnargili hefur verið ötull talsmaður hinnar svokölluðu Fljótaleiðar, sem ég álít alls ekki svo vitlausa hugmynd að því tilskildu, auðvitað, að byggður yrði upp heilsársvegur yfir Lágheiði. Þá yrði engin þörf fyrir veginn um Almenninga og Strákagöng, sem er vel, því ég býst við því, miðað við umræðurnar í dag, að upphefðist kór mótmælenda víða á landinu, þegar að því kæmi að ráðast þyrfti í langvinnar og kostnaðarsamar viðgerðir á þeim vegi til þess að siglfirðingar kæmust inn í Skagafjörð og skemmri leið suður en í gegn um Héðinsfjarðargöng, inn Eyjafjörð, yfir Öxnadalsheiði í Skagafjörð og suður. Ef nægir peningar væru til í gangagerðina væri auðvitað skynsamlegast að fara með göngin inn í Hólsdal fyrir botn Héðinsfjarðar yfir í Ólafsfjörð með afleggjara inn í Fljót. Þá myndu menn sleppa við vegskála og snjóflóðahættu í Héðinsfirði og veginn yfir Almenninga. Ég veit ekki hvort þessi hugmynd hefur verið athuguð, né hvað hún myndi kosta, en mér finnst hún jafnast á við að slá tvær flugur í einu höggi, þ.e.a.s. ef maður á spaðann,(peningana).

Það er alveg makalaust hvað tæknin færir manni. Ekki nóg með að það sé hægt að koma manni til tunglsins, heldur er hægt að skrifa svona einhverja vitleysu um allt og ekkert og einhver í næsta sólkerfi getur lesið það og jafnvel sent mér athugasemdir um það sem ég skrifaði, eða bara sagt mér fréttir af sér og sínum.

Á þessari síðu minni mun ég bulla um hitt og þetta, einskonar "borðsalsumræður" en það fyrirbæri þekkist víst ekki lengur á sjónum; allir uppteknir við að góna á sjónvarpið, gervihnöttinn, eða sofandi. Hér áður var maður ekki par ánægður með vaktina ef ekki voru einhverjar umræður í borðsalnum. Oft voru þessar umræður svo skemmtilegar, eða æsandi, að maður átti erfitt með að sofna á frívaktinni og mætti svo fúll á næstu vakt og hafði allt á hornum sér í næstu umræðum, sem skemmti auðvitað einhverjum er ekki höfðu náð sér á strik í þeim síðustu, en þannig er víst lífið; upp og niður.